အရှုပ်အထွေးများကို ရှင်းထုတ်ခြင်း

၁၃၊၃၊ ၂၀၁၈ ရက်စွဲဖြင့် ထုတ်ပြန်သည့် အခြေခံပညာကျောင်းသာများ သမဂ္ဂ၊ ဗကသများအဖွဲ့ချုပ်၏ ကိုဖုန်းမော်၊ ကိုစိုးနိုင်တို့ ကျ ဆုံးခြင်းနှစ် (၃၀) ပြည့် ၀မ်းနည်းခြင်း အထိမ်းအမှတ် အခမ်းအနားများသို့ ပေးပို့ သည့် သ၀ဏ်လွှာ တွင် “ စစ်အာဏာရှင် စနစ် ကျဆုံးပါစေ၊” ကြွေးကြော်သံသည်။ ယနေ့ခေတ်၏ ကြွေး ကြော် သံဖြစ်ပေသည်။

ယခုအခါ လူမှုရေး အဖွဲ့အစည်းများ မှိုလိုပေါက်နေခြင်း၊ ၂၀၀၈ ခြေဥ ပြင်ရေး၊ ဖျက်သိမ်းရေး၊ ကြွေးကြော်သံများ၊ ငြိမ်းချမ်းရေးကြွေးကြော်သံများ၊ တရားဥပဒေ စိုးမိုးရေး တောင်းဆိုသံများ ဖြင့် ပွက် လောရိုက်ခါ ရှုပ်ထွေး နေသည့်ကာလတွင် စစ်အာဏာရှင်တို့၏ ဖိနှိပ်မှုကို ပွင့်ပွင့်လင်းလင်း မီးမောင်း ထိုးပြ လိုက် သလို ဖြစ်ခြင်းကြောင့် ဤ ကြွေကြော်သံကို အလေးထား ကိုင်စွဲသင့်ပေသည်။

အချောင်သမားတို့သည် ခက်ခဲကြမ်းတမ်းသည့် လမ်းကိုအမြဲရှောင်လွှဲခါ လူထု၏ အမြင်ကို ရှုပ်ထွေးေ၀၀ါးစေပါသည်။ သူတို့သည် စစ်အာဏာရှင်တို့နှင့် အပေးအယူလုပ်ရန် အခွင့်အခါကို သိက္ခါမဲ့စွာ စောင့် မျှော်နေတတ်ကြပေသည်။ သက်သာသောနည်းလမ်းသည် ကောင်းသယောင်ရှိသော်လည်း အမှန်တကယ် ရည်မှန်းချက်ကို မရောက်ပါ။ အဘယ်ကြောင့်ဆိုသော် ရန်သူအကြိုက်လိုက်နေခြင်းဖြင့် မိမိအင်အားနှင့် အချိန် တို့ကို ဖြုန်းတီးရာကျသလို ရန်သူကို သက်ဆိုးရှည်စေပါသည်။ အထူသဖြင့် ရန်သူသည် အာဏာရှိ စည်းဇိမ်ရှိပါက ကိုယ့်ဘက်သားတို့ကို အကျင့်ပျက်ခါ ဖျက်ဆီးတတ်ပါသည်။ ယနေ့ အပစ်ရပ် အဖွဲ့တွေနှင့် NLD အစိုးရ ဆိုသည်တို့ ဖြစ်နေပုံ ကို ကြည့်ပါက သိနိုင်ပါတယ်။ အဆိုးဝါးဆုံး အချက်မှာ လူထု၏အမြင်ကို ရှုပ်ထွေးစေလျှက် ရန်သူ၏ သားကောင်ဘ၀သို့ တရွေ့ရွေသက်ဆင်းသွားနေခြင်းပင် ဖြစ်ပါသည်။

စစ်အာဏာရှင်စံနစ်သည် ယနေ့ဗမာပြည်တွင် မင်းမူနေခါ တိုင်းပြည်၏ နိုင်ငံရေး ၊ စီးပွါးရေး၊ အုပ်ချုပ်ရေးများတွင် ဖိနှိပ်သွေးစုတ်အမြတ်ထုတ်နေစဲ၊ အခွင့်ထူးခံနေစဲ ဖြစ်နေကြောင်း နေ့ဓဒူဝ ဖြစ်စဉ် များကဖေါ်ပြ နေပါသည်။ ဤနေ့ ဖြစ်ပေါ်နေသော ပြဿနာတို့၏ အရင်းအမြစ်မှာ စစ်အာဏာ၏ ချုပ်ကိုင် မှုကြောင့်ပင် ဖြစ်ပါသည်။ ဤဖိနှိပ်လျှက်ရှိသော စစ်အာဏာကျဆုံးရန် ဖြိုဖျက်ကြဖို့ လိုပါသည်။ လူထုတို့၏ ရည်မှန်းချက် အာရုံသည် ထို အချက်ပေါ် မဏ္ဍိုင် ပြုခါ ရုန်းကန်လှုပ်ရှားကြရပါမည်။ စစ်အာဏာရှင်တို့နှင့် သူ၏လက်ပါးစေ လက်ဝေခံ တို့ ဖိနှိပ်သွေးစုတ်မှု ကို ဖေါ်ထုတ်ဖွင့်ချခြင်း၊ တားဆီးဆန့်ကျင်ခြင်း၊ တို့ကို လူထုအားနှင့် လုပ်ဆောင်သင့်ပါသည်။

စစ်အာဏာရှင်စံနစ် ဆန့်ကျင်ရေးလုပ်ငန်းသည် အချောင်သမားတို့နှင့် တော်လှန်ရေးလှုပ်ရှားမှုကို စည်းခြားသည့် မျဉ်းလည်းဖြစ်ပါသည်။ ထိုကြောင့် “ စစ်အာဏာရှင်စနစ် ကျဆုံးပါစေ။” ကြွေးကြော်သံကို ကျယ်ပြန့်သည်ထက် ကျယ်ပြန့် ရန်လှုပ်ဆော်စည်းရုံး လုပ်ဆောင်ကြရမည်။ စစ်တပ်အပါအ၀င် လူထုက အကောင်အ ထည်ဖေါ်လာရန် နည်း လမ်း ပြကြရမည်။ တခြားလမ်းလွဲလမ်းခွဲများတွင် အချိန်ကုန်လူ ပမ်းဖြစ်နေခြင်း မှ ကာကွယ်တာဆီးကြ ရပါလိမ့် မည်။

တိုက်ပွဲမ၀င်ဘဲ၊ မည်သို့သောအာဏာရှင်မှ အလိုအလျှောက် ပလ္လင်ပေါ်မှ ဆင်းရိုးထုံးစံမရှိပါ။ စစ်အာ ဏာရှင်တို့အား အလျှော့ပေး ဆက်ဆံသူများသည် စစ်အာဏာရှင်အလိုတော်ရှိ များသာဖြစ်ပေသည်။ သူတို့ သည် ဗြောင်စစ်အာဏာရှင်ထက် လူထု၏ စိတ်ဓါတ်ကို ပျက်စီးစေတတ်သည်။

ထိုကြောင့် “ စစ်အာဏာရှင်စနစ် ကျဆုံးပါစေ။” ကြွေးကြော်သံအောက်တွင် အားလုံးစုစည်း၍ အဓိကကျသော စစ်အာဏာရှင် စနစ် တိုက်ဖျက်ရေး လုပ်ငန်းစဉ်တို့ကို အကောင်အထည်ဖေါ် သင့်ကြပါသည်။ တခြားသော ကြွေးကြော်သံ များသည်လည်း ထိုကြွေးကြော်သံ ရည်မှန်းချက်ကိုသာ ဦးတည် အကောင် အထည်ဖေါ် သင့်ကြောင်း တင်ပြလိုက်ရပါသည်။

စစ်အာဏာရှင်စံနစ် ကျဆုံးပါစေ။

အကသ နှင့် ဗကသ အဓွန့်ရှည်ပါစေ။

ဦးအေးဆောင်

မတ်လ - ၂၂၊ ၂၀၁၈